New York Herald Tribune (1939) / Rrëfimi i Mbretëreshës Geraldinë në Versajë : edukimi i djalit, simbolika e kurorës mbretërore, Skënderbeu, dhoma e preferuar në kështjellë…

Nga Aurenc Bebja*, Francë – 26 Maj 2022

“New York Herald Tribune” ka botuar, të premten e 18 gushtit 1939, në faqen n°3, një shkrim në lidhje me intervistën e mbretëreshës Geraldinë realizuar asokohe në kështjellën e La Maye në Versajë, të cilën, Aurenc Bebja, nëpërmjet Blogut “Dars (Klos), Mat – Albania”, e ka sjellë për publikun shqiptar :

Edukimi amerikan për Skënderbeun (Leka Zogun) i marrë në konsideratë nga mbretëresha Geraldinë

Mbretëresha shqiptare në mërgim në Versajë e intervistuar thotë se shqetësimi kryesor tani është rritja e djalit katërmuajsh; Planet e së ardhmes të pasigurta

Mbretëresha Geraldinë e Shqipërisë, e cila tashmë jeton në Versajë, pas fluturimit (udhëtimit) dramatik nga Tirana kur italianët pushtuan Shqipërinë, tha dje në një intervistë ekskluzive për United Press se djali i saj prej katër muajsh, Princi Skënderbeu, mund të shkollohet në Shtetet e Bashkuara.

Sytë e saj duke buzëqeshur me miqësi ndërsa fliste, mbretëresha e re e gjatë dhe e bukur shpjegoi këtë mundësi duke thënë se “të gjithë e dinë se çfarë vendi i mrekullueshëm është.”

Nëse grushti i shtetit italian i së Premtes së Shenjtë merr fund, Princ Skënderbeu mund të vijë një ditë në fron në qytetin e sapomodernizuar të Tiranës. 

Të edukohet si njeri

“A do të arsimohej për të qenë një mbret demokratik?” u pyet mbretëresha.

“Ai do të edukohet para së gjithash për të qenë burrë,” u përgjigj ajo shpejt.

“Ai do të edukohet në të gjitha gjuhët e rëndësishme, duke përfshirë anglishten dhe frëngjishten.”

Çifti mbretëror, që tani jeton në kështjellën e La Maye në Versajë – shtëpia e banuar dikur nga Duka dhe Dukesha e Windsor-it – planifikojnë që më vonë djali i tyre të ketë shoqëruesë anglezë dhe francezë për t’i ardhur në ndihmë dados aktuale gjermane. 

Kurorëzuar me besim

Por edhe nëse një ditë do të kishte fronin e tij, ai kurrë nuk do të mbajë një kurorë – pasi nuk ekziston. Mbretëresha Geraldinë e shpjegoi këtë situatë në këtë mënyrë: “Kurora e Shqipërisë është vetëm simbolike. Populli i Shqipërisë na kurorëzoi me vetë besimin në pavarësinë e vendit. Kjo është shumë më e qëndrueshme. Emblema e vendit tonë është helmeta e Skënderbeut.” Skënderbeu ishte heroi i madh kombëtar i Shqipërisë.

“Ai është aq i vogël sa nuk kemi bërë ende shumë plane për të ardhmen e tij,” tha Mbretëresha Geraldinë.

E qetë dhe e hijshme, mbretëresha e re më priti me një shtrëngim duarsh të fortë në dhomën e pritjes së vilës.

Mjaft e çuditshme, mbreti Zog dhe gruaja e tij e morën me qira kështjellën pa e ditur se më parë ajo ishte banuar nga Windsor-ët.

Nëna banon në kështjellë

Me mbretëreshën Geraldinë gjatë intervistës ishte nëna e saj, tashmë gruaja e një oficeri të ushtrisë franceze.

Mbretëresha e re kishte veshur një fustan të bardhë sportiv me një xhaketë me stampa bardh e zi, të cilët i bleu ndërsa ajo dhe mbreti Zog po udhëtonin nëpër Evropë gjatë rrugës nga Turqia në Francë.

Ajo hodhi poshtë çdo përmendje të modave dhe stileve duke thënë se tani i kushton pak rëndësi “elegancës”, duke pasur parasysh se ka çështje shumë më të rëndësishme për të vendosur. Ajo ende nuk i ka blerë rrobat e reja të vjeshtës, por planifikon t’a bëjë më vonë – ndonëse nuk e di se te cili stilist i Parisit do të shkojë.

Planet e ardhshme të familjes mbretërore duken të pasigurta. Tre motrat e Mbretit, të cilat kanë qenë me ta që nga fluturimi (udhëtimi) i ethshëm nëpër malet e Greqisë, do të qëndrojnë me shumë mundësi në kështjellë.

E pyeta mbretëreshën Geraldinë se cila pjesë e kështjellës madhështore i pëlqente më shumë. “Dhoma e bebit tim”, tha ajo me një sinqeritet simpatik.

* Çdo gazetë online apo print, çdo portal që merr këtë shkrim duhet të citojë autorin në fillim të shkrimit (Nga Aurenc Bebja, Francë) dhe burimin e informacionit në fund (Blogu © Dars (Klos), Mat – Albania), si dhe të vendosë linkun e burimit : https://www.darsiani.com/la-gazette/new-york-herald-tribune-1939-rrefimi-i-mbretereshes-geraldine-ne-versaje-edukimi-i-djalit-simbolika-e-kurores-mbreterore-skenderbeu-dhoma-e-preferuar-ne-keshtjelle/. Në rast të kundërt mos e publiko.

Publikuar në :

https://gazetadielli.com/new-york-herald-tribune-1939-rrefimi-i-mbretereshes-geraldine-ne-versaje-edukimi-i-djalit-simbolika-e-kurores-mbreterore-skenderbeu-dhoma-e-preferuar-ne-keshtjelle/

https://www.kultplus.com/trashegimia/new-york-herald-tribune-1939-rrefimi-i-mbretereshes-geraldine-ne-versaje-edukimi-i-djalit-simbolika-e-kurores-mbreterore-skenderbeu-dhoma-e-preferuar-ne-keshtjelle/

http://www.illyria.com/new-york-herald-tribune-1939-rrefimi-i-mbretereshes-geraldine-ne-versaje/

https://www.syri.net/arte-media/508900/rrefimi-i-mbretereshes-sgeraldine-nga-versaja-edukimi-i-princit-simbolika-e-kurores-dhoma-e-preferuar-ne-keshtjelle/

https://diasporashqiptare.al/2022/05/26/new-york-herald-tribune-1939-rrrefimi-i-mbretereshes-geraldine-ne-versaje/

https://dosja.al/art-argetim/rrefimi-i-mbretereshes-geraldine-ne-varsaje-edukimi-idjalit-simbolik-i217146

https://drini.us/new-york-herald-tribune-1939-rrefimi-i-mbretereshes-geraldine-ne-versaje-edukimi-i-djalit-simbolika-e-kurores-mbreterore-skenderbeu-dhoma-e-preferuar-ne-keshtjelle/

https://opinion.al/1939-rrefimi-i-mbretereshes-gelardineedukimi-i-djalitsimbolika-e-kurores-dhe/

https://www.botasot.info/historia-lajme/1817192/new-york-herald-tribune-1939-rrefimi-i-mbretereshes-geraldine-ne-versaje-edukimi-i-djalit-simbolika-e-kurores-mbreterore-skenderbeu-dhoma-e-preferuar-ne-keshtjelle-hellip/

https://observerkult.com/rrefimi-i-geraldines-edukimi-i-djalit-simbolika-e-kurores-mbreterore-skenderbeu-dhoma-e-preferuar-ne-keshtjelle/

https://vloranews.al/kulture/new-york-herald-tribune-1939-rrefimi-i-mbretereshes-geraldine-ne-versaje-edukimi-i-djalit-simbolika-e-kurores-mbreterore-skenderbeu-dhoma-e-preferuar-ne-keshtjelle/

https://alb-spirit.com/2022/05/26/new-york-herald-tribune-1939rrefimi-mbretereshes-geraldine-ne-versaje/

https://konica.al/2022/05/mbreteresha-geraldine-princ-skenderbeu-mund-te-vije-ne-fron/